Anpezo l è senpre stà in luò agnoche s’à incrojà trope scritore.

A metà del otozento, l à scomenzà a vegnì sciore par conosce ra belezes de ra nostra tera, da pì de un secol ra nostra val r’à abù scritore da duto el mondo.

Ra mereea de ra crodes, ra montes, i bosche e i prade i è stade ispirazion par libre, film e jornalismo. Coscì l’è suzedù che Anpezo l è deentà un Museo de ra leteratura de ra Dolomites.

“Accadde a Cortina” l è un troi de fantasia con segnai culturai, inze meso ra Dolomites Patrimonio Unesco. Se po’ śirà intrà i disdoto placate inze i meo luoghe de ra piaza a Cortina e par duta ra val. Se podarà ciatà e liese paroles de scritore, scenes de film, sonete de poetes. Intrà ra curiositas se podarà saé che Dino Buzzati aea un gran amor par ra Croda da Lago. Che Ernest Hemingway el s’aea ciatà inze piaza na sera d’outon del 1948 con Fernanda Pivano. Che Eugenio Montale l à scrito na poesia, algo de bel, sul Lago del Sorapisc. Che Edward Morgan Forster, inze una de ra soa conties, l à descrito Anpezo.  Che doa femenes intà i prime sciore che darsonsea el nosc paes, Amelia Edwards ed Elisabeth Tuchett, ś à scrito de Anpezo. Che Rachele Padovan anpezana, r à azetaà inze ra so stua a Salieto gran scritore.

Cuante secrete se conoscelo del nosc paes?

Varda drio dute e 18 i placate on line, zerne fora inze ra mapa, opura va a vede de un scritor inze l’indesc de gnomes. O mangare fejete liese i teste da un ator o na atrice, mangare intanto che te fesc doi pasc śò par pede el Lago de Pianozes, o su ra ex farata, o canche te vardes ra val dal sorei del Col Druscié.

“Accadde a Cortina” l è un archivio par Talian e Inglese, con na sezion par Ladin Anpezan, che dute po dorà ogni ota che i vo. Na idea de Una Montagna di Libri, ra festa de ra leteratura de Cortina d’Anpezo. Fato anche con na bona man del Comun d’Anpezo e ra Rejon de el Veneto e con lore CortinaBanca, ra Cooperativa di Cortina, ra Regoles d’Anpezo, Emons Audiolibri, Elleboro Editore e ra Union de i Ladis de Anpezo.